Croeso i'n cwr ni o Gymru, ardal nefolaidd o'r Gororau rhwng Ysgyryd Fawr y tu allan i'r Fenni yn Sir Fynwy ac Afon Mynwy yn Ynysgynwraidd, gan gynnwys cymunedau bychain cefn-gwlad Llangatwg Lingoed, Cross Ash a'r Grysmwnt. Mae erwau braf Swydd Henffordd i'r dwyrain ac ucheldiroedd y Mynydd Du i'r gorllewin. Mae'r hyn sy'n gorwedd rhyngddynt yn dal i fod yn gyfrinach heb ei datgelu, i raddau helaeth - hanes ar ffurf cestyll, eglwysi, adeiladau rhestredig, llwybrau troed a chyndeidiau enwog; golygfeydd hardd a gyrhaeddir ar hyd lonydd gwledig troellog, a chroeso cynnes mewn llefydd gwely a brecwast teuluol, tafarndai a bythynnod hunan-ddarpar. Defnyddiwch y wefan yma i gynllunio taith neu ddysgu am hanes teuluol lleol. Dysgwch am broject Ymddiriedolaeth y Pentre Byw, a gyllidir gan yr UE, i adfer adeiladau hanesyddol lleol a chofnodi atgofion pobl am ffordd o fyw sy'n prysur ddiflannu. Mynnwch flas ar le cyfareddol lle mae'r boda'n hedfan yn yr wybren las, glir, a lle gallwch fynd yn ôl mewn amser ... Mae'r cwr hwn o Sir Fynwy yn ddelfrydol fel canolfan ar gyfer gweithgareddau sy'n amrywio o gerdded, seiclo, merlota a theithio mewn car i ymweld â chestyll a threfi marchnad. I rai egnïol, mae mynyddoedd i'w dringo (Mynydd Pen-y-fâl, Blorens, Ysgyryd Fawr, y Mynydd Du a Bannau Brycheiniog) ac ogofeydd dwfn i'w harchwilio (Llangynidr). Mae'r ardal hefyd yn boblogaidd gyda gleidwyr-barcud, pysgotwyr, golffwyr, a rhai sy'n hwylio ac yn canwio, gan fod llu o gyfleusterau o fewn cylch o bymtheg milltir i Langatwg Lingoed. Yn ogystal â chronfeydd dwr, afonydd a nentydd i'w mwynhau, dyma gartref Camlas Mynwy ac Aberhonddu sy'n ymdroelli drwy olygfeydd hardd.
Daw'r tudalennau hyn, sy'n ceisio codi blys arnoch am gael gwybod mwy am ein treftadaeth, hanes a lletygarwch, drwy law elusen leol, Ymddiriedolaeth y Pentre Byw. Mae gan yr Ymddiriedolaeth ddau broject mawr ar y gweill: adfer dau adeilad rhestredig lleol a chasglu hanesion llafar, fel rhan o ddiddordeb mwy cyffredinol mewn diogelu diwylliant a hanes cefn gwlad. Y ddau adeilad yw'r ty seidr yn Fferm y Cwm a'r ty ffynnon yn New Inn. Lluniwyd cynlluniau manwl, gyda chymorth pensaer cadwraeth a chyngor gan Swyddog Cadwraeth Cyngor Sir Mynwy, i adfer yr adeiladau gan ddefnyddio defnyddiau gwreiddiol, cyn belled ag y bo'n bosib. Sicrhawyd y caniatâd cynllunio angenrheidiol. Bydd deunyddu hyrwyddo, cyfleusterau dehongli a chyhoeddusrwydd ar y safle ac ar y wefan Pentre Byw yn dod Pentre Byw yn dod â'r trysorau anghof hyn i sylw cenhedlaeth newydd o ymwelwyr. Mae'r Project yn gweithio gydag ysgolion i ddylunio deunyddiau cwricwlwm a chymhorthion dysgu wedi eu seilio at gynnyrch y project hwn. Mae gan y rhan fwyaf o breswylwyr trefi wreiddiau yn y wlad. Drwy ei gwefan, mae'r Ymddiriedolaeth yn helpu pobl i olrhan cyndeidiau a oedd yn byw yn yr ardal hon ac yn eu hannog i ymweld. Drwy gefnogi astudio hanes lleol, mae'n helpu i ddarparu cyd-destun ar gyfer hanes teuluoedd ac yn helpu ymwelwyr i werthfawrogi'r ardal. Mae'r Ymddiriedolaeth yn gwneud project mawr i gofnodi atgofion am fywyd cefn gwlad yng nghanol yr 20fed ganrif.